Jos 5 | TBG | STEP | Amo vatanaa avuhainauka Iotani Namari hini mantaraini kuari avu ruhunkinaini vaukave, Kenaani avuhainauka Meditarenia Namari auvahini vaukave, vikavata iruvaro Noravano Kotiva Isareri namari ho taqa vare vuate tiro, Iotani Namari aaharaiqama nimitora. Vika vi uvara iruvaro voqama kero naatu itomanta vika iqoka raqi kempukava kia vaumanta vaura.

Joshua 5

Isareri vika nái vaata toqa kora

1 Amo vatanaa avuhainauka Iotani Namari hini mantaraini kuari avu ruhunkinaini vaukave, Kenaani avuhainauka Meditarenia Namari auvahini vaukave, vikavata iruvaro Noravano Kotiva Isareri namari ho taqa vare vuate tiro, Iotani Namari aaharaiqama nimitora. Vika vi uvara iruvaro voqama kero naatu itomanta vika iqoka raqi kempukava kia vaumanta vaura.

2 Vi entara Noravano Kotiva Iosuaarara tiharo, Ne roqori ori vaihairaqohai nenta Isareri qorainti vaata toqa kaate, tiro.

3 Minti tuvaro Noravano Kotiva tunte iro Iosuaava ori vaihaira vara komanta ekaa Isareri qorainti vika nái vaata toqa kora. Vika vi vatara autu nteha,Gibeati-Haaraloti – Vaata Toqakaa Aiqinarave, tura.

4 Haaru Isipini vau entara Isareri vika ekaa vaiintive, vika maaquvarave, vaata toqakoka vaura. Ho vika Isipi mini ke 40 ihiara aahara vataini vi ani vau entara, qorainti vainti mini vatatoka kia vaata toqa nimitora.

Vika Isipiqihai anu entara 40 ihi aitaromanta ho iqoka raqi vaiintika aahara vataini variqi vivi, Nora Kotira uva raqakora kaara mini ekaa qutu vura.

Tota Noravano Kotiva nai kauqu aiqiqaa aqukero vikara tiharo, Ne ti uva raqakaara kaara, te ni kaivaqaukavarara tiha, Te karavano koqema kero qampiqaaina vatara ni Isareri nimirerave tuna uvava kiama niqi varianarove, tura.

7 Noravano Kotiva minti tumanta vi vaiintika variqi vi vuru qutu vumanta vika maaquvara noruqamavi kia vaata toqa koka vauvarora tiro, Iosuaava vikara tumanta vika vaata toqa nimitora.

8 Vika vaata toqa nimitova tavanta vuarire ti, ekaa Isareri vika náiseri naavu kaqatoraqi qaqi vaura.

9 Mintuvaro Noravano Kotiva Iosuaarara tiharo, Ne Isareri Isipini vau entara vi vatanaaka ni rumpa tomanta ne vika paanaa kaiqa vare vaura kaara kaurira haikavano niqaa vaurave. Ho vate te kaurira haika vira niqaahai qaqini varake taiqama kauro, tiro.

Noravano minti turara ti, vika vi vatara autu nteha,Giligaalive — Qaqini-Vara-Korave tura. Maa entaravata vaiinti nahenti vi vatara autu qaqi nte variara.

10 Ho avuhainaa tora 14 entaqaa Isareri vika Ieriko uqita kanta Giligaalini náiseri naavu maaqa kaqatonaini vaiha, haaruenselivano Isareri vika Qaqi Vehakuma Nimito entarara iriha kara nora.

11 Vira qararaa vika Kenaani vataini naahoqibaali qampiqora teqake vare, hinibaali ihaqi untake ne, hinibaali kia noqai mparetira untake nora. (Baalivaireva,raisive voqaarama vairo.)

Vi entaraqaa vika avuni hoqaramake Kenaani vataini qampiqo karara varake nora.

12 Vika vi karara novaro vira qararaamanaavano kia qaiqaa hiqintumanta vika kia vi karara qaiqaavata varake nora. Vi entaraqaahai Isareri vika Kenaanini qampiqo karara varakeha ne vaura.

Iqoka paipe tote vau vaiintira

13 Vo enta Iosuaava Ieriko tataaqa vaiharo vuruvi tavovaro vaiinti vovano iqoka paipe nai kauquqi totero vira avuni himpitero vaura.

Mintuvaro Iosuaava raukuviro viva unaini oruntero virara tiharo, Are tinavu iqoka vaiintivanoe variaro, tinavu navutaavae variaro? tiro.

14 Iosuaava minti tuvaro viva aqao tiro, Te kia ni iqoka vaiintivauve vauro. Te kia ni navutaakavauve vauro. Te Nora Kotira iqoka vaiinti vika avuhainaukama vauro, tiro.

Minti tuvaro Iosuaava vatakanta hiqinti viro nai viri vataini kero vi vaiintira quahama amiteharo tiharo, Mpo, nora vaiintio, te ai kaiqa vaiintima vauro. Te nana kaiqae ai vara amitararave? tiro.

15 Minti tuvaro Nora Kotira iqoka vaiinti vika avuhainaava tiharo, Are te vauna vatara turuaraini himpi varianarara tira, nena aiquqaa nonku taanara qaqini rahunku kera variane, tuvaro Iosuaava viva tunte ura.